kiri uyu wa Gatandatu Kamena 2023 iki kigo cyagaragaje ko muri uyu mwaka wa 2023 abasanzwemo imitezi bageze ku 82.592 bangana n’ubwiyongere bwa 50%.
Uwo mubare ni wo wa mbere ubayeho kuva abafatwa n’izo ndwara batangira kubarurwa.
Abanduye mburugu bangana na 8.692 imibare yiyongereho 15% ugereranyije n’ababaruwe mu mwaka wabanje, ukaba umubare munini w’abanduye iyo ndwara kuva mu 1948.
Ubwiyongere bw’indwara zandurira mu mibonano mpuzabitsina mu Bwongereza muri rusange bwiganje cyane mu rubyiruko ruri hagati y’imyaka 15 na 24 mu gihe imitezi yo ngo iri kwiyongera mu baturage b’ibyiciro byose.
Mburugu iri kwiyongera mu baryamana bahuje igitsina, abakora imibonano mpuzabitsina mu buryo bubiri ni ukuvuga abaryamana n’abagabo bagahindukira bakaryamana n’abagore (bisexual) cyangwa abagabo baryamana n’abagabo bagenzi babo gusa ndetse n’abaryamana n’abo badahuje ibitsina.
Iki kigo cy’Abongereza gishinzwe ubuzima kandi cyerekana ko abanduye izo ndwara mu bihe bya Guma mu Rugo mu 2020 bagabanyutse cyane, imibare itangira kongera kuzamuka mu 2021 ubwo abantu bari batangiye kubohoka bemerewe kugenderanirana.
Abaturage bakanguriwe gukora imibonano mpuzabitsina ikingiye kuko “udukingirizo ari bwo buryo bwiza bwo kwirinda” bikajyana no kwipimisha inshuro nyinshi.
Imibare y’Ishami ry’Umuryango w’Abibumbye ryita ku Buzima, OMS, igaraza ko buri mwaka haboneka indwara nshya zandurira mu mibonano mpuzabitsina ku bangana na miliyoni 374 aho imwe mu ndwara enye ari yo ivurwa igakira.
