Umuyobozi w’Ingabo za Sudani Gen Abdel Fattah Al Burhan, kuri uyu wa Gatanu yakuye Gen Mohamed Dagalo uzwi nka Hemedti uyobora umutwe wa Rapid Support Forces (RSF), mu nama ya gisirikare iyoboye igihugu.
Ni intambwe yari yitezwe, itewe nyuma y’imirwano imaze iminsi ishyamiranyije Ingabo za Leta na RSF.
Gen Al Burhan yashyizeho Malik Agar, umuyobozi w’umutwe witwaje intwaro wasinyanye na guverinoma amasezerano y’amahoro mu 2020, kugira ngo asimbure Gen Dagalo.
Izi mpinduka zabaye nyuma y’ukwezi abo bajenerali bombi barwanira kugenzura igihugu, nyuma y’amakimbirane ashingiye ku kwinjiza RSF mu gisirikare no gushyikiriza ubutegetsi abasivili.
Kuri uyu wa Gatanu, umurwa mukuru Khartoum n’umujyi wa Bahri yagabweho ibitero by’indege, bituma ibintu birushaho kuba bibi.
Ihuriro ry’abaganga ba Sudani ryatangaje ko byibuze abasivili 800 bapfuye kugeza ubu kubera amakimbirane.
Ibitaro birenga 70 ku ijana byo mu turere turimo intambara nabyo ntibicyakira abarwayi. Ishami ry’Umuryango w’Abibumbye ryita ku Buzima, OMS, ryanenze isahurwa ry’amatoni y’ibikoresho muri icyo gihugu.
Ishami ry’umuryango w’abibumbye ryita ku mpunzi, UNCHR, ryatangaje ko abantu barenga miliyoni bavanywe mu byabo n’imirwano harimo nibura 843.000 bakiri imbere mu gihugu.
Abantu bagera ku 250.000 nabo bahungiye mu bihugu nka Misiri na Tchad.
