Nyaruguru: Abakozi babiri b’Akarere batawe muri yombi bakurikiranyweho kunyereza umutungo
Urwego rw’Igihugu rw’Ubugenzacyaha, RIB, rwafunze Ndungutse Leon, Umuyobozi w’Imirimo na Amahe Arthur ushinzwe imibereho myiza bakoreraga Akarere ka Nyaruguru, bakekwaho kunyereza umutungo.
RIB yavuze ko icyaha abo bagabo bombi bakekwaho ari icyo kunyereza umutungo ungana na 3.308,000 Frw yari agenewe gukurikirana ibikorwa bya VUP mu mirenge 12 y’Akarere ka Nyaruguru, no gukoresha inyandiko zitavugisha ukuri kandi bigakorwa mu bihe bitadukanye.
RIB yemeje ko abakekwa bafungiye kuri Sitasiyo ya RIB ya Kibeho, mu gihe dosiye zabo zirimo gutunganywa kugira ngo zishyikirizwe ubushinjacyaha, iburira abayobozi bafite mu nshingano zabo gucunga umutungo wa rubanda kubahiriza ibiteganywa n’amategeko, kuko kunyurana nabyo bigize ibikorwa bihanwa n’amategeko, kandi ikibutsa ko idateze kudohoka ku nshingano zo gukurikirana abantu nk’abo kugira ngo bahanwe n’amategeko.
Icyaha cyo kunyereza umutungo, ni icyaha giteganywa kandi kigahanishwa ingingo ya 10 y’itegeko N°54/2018 ryo kuwa 13/08/2018 ryerekeye kurwanya ruswa. Icyaha cyo guhimba inyandiko giteganywa kandi kigahanwa n’ingingo ya 276 y’Itegeko Nº68/2018 ryo ku wa 30/08/2018, riteganya ibyaha n’ibihano muri rusange.
