ikipe ya Juventus nyuma y’uko isezerewe n’ikipe ya Lyon mu mikino ya Uefa Champions league, yahise yirukana umutoza Maurizio Sari wari usanzwe ayitoza,azira kuba adafashije iyi kipe gukomeza muri iyi mikino, kuri ubu iyi kipe ikaba yamaze kubona umutoza mushya uwo tawundi akaba ari Andrea Pirlo.
Andrea Pirlo ufite imyaka 41, akaba akomoka mu gihugu cy’Ubutaliyani, yagizwe umutoza mushya wa Juventus, asimbuye Maurizio Sarri wirukanywe ku wa Gatandatu,nyuma y’uko asezerewe mu mikino ya UEFA Champions league.
Uyu mugabo wabaye umukinnyi ukomeye mu ikipe ya Juventus kuva muri 2011 kugeza muri 2015, yasinye amasezerano y’imyaka ibiri yo gutoza iyi kipe azarangira tariki 30 Kamena 2022. akaba yari aherutse kugirwa umutoza w’ikipe y’abatarengeje imyaka 23 ya Juventus mu mpera z’ukwezi gushize.
Mu mikino 164 yakiniye ikipe ya Juventus mu gihe cy’imyaka ine yayimazemo, Andrea Pirlo yegukanye ibikombe bine bya Shampiyona, yegukana kandi ibikombe bya Coppa Italia ndetse na Super Cup inshuro ebyiri.Yabaye kandi umukinnyi ukomeye mu ikipe y’Igihugu y’u Butaliyani, aho ari mu begukanye Igikombe cy’Isi cya 2006 cyabereye mu Budage.
Pirlo wasezeye umupira w’amaguru mu 2017 ubwo yakiniraga New York City FC yo muri Major League Soccer, yaherukaga gutangaza ko ashaka gutera ikirenge mu cya Pep Guardiola utoza Manchester City na Zinedine Zidane utoza Real Madrid.
