Ikipe ya Polisi y’u Rwanda mu mukino w’intoki wa Volleyball (Police VC) kuri iki cyumweru tariki ya 24 Nzeri 2023, yegukanye igikombe mu irushanwa ngarukamwaka ‘Kirehe Open Tournament’ ritegurwa n’akarere ka Kirehe rigahuza amakipe yo mu cyiciro cya Mbere.
Ni irushanwa ribaye ku nshuro ya gatatu, ryatangiye ku wa Gatandatu tariki 23 Nzeri, aho mu bagabo ryitabiriwe n’amakipe arindwi yari agabanyijwe mu matsinda abiri, n’amakipe atatu mu bagore.
Ikipe ya Police VC mu bagabo yari mu itsinda rya Mbere, yari ihuriyemo n’amakipe nka Kirehe VC na KVC, amakipe yombi yabashije gutsinda ku munsi wa mbere mu mikino y’amajonjora, aho yatsinze Kirehe VC ku maseti 3-1 na KVC ku maseti 3-0, bikayihesha itike yo gukina umukino wa ½ cy’irangiza.
Mu mukino wa ½ cy’irangiza wabaye mu gitondo cyo ku Cyumweru, Police VC yasezereye APR VC iyitsinze amaseti 3-0 nyuma y’uko iseti ya mbere yarangiye ku manota 25 kuri 23 ya APR VC, iya Kabiri irangira ku manota 25 kuri 17, mu gihe iseti ya gatatu Police VC yayitsinze ku manota 25 kuri 23 ya APR VC, ihita ikatisha itike yo gukina umukino wa nyuma.
Mu mukino wa nyuma (Final) wabaye nyuma ya saa sita, Police VC yawitwayemo neza yegukana igikombe itsinze ikipe ya Gisagara VC ku maseti 3-1.
Ni umukino waranzwe n’ishyaka ku mpande zombi kuva ugitangira aho iseti ya mbere yegukanywe na Gisagara VC ku manota 25 kuri 16 ya Police VC.
Nyuma y’akaruhuko, ikipe ya Police VC yagarutse yariye karungu, yigaranzura Gisagara VC, iza kuyitsinda amaseti atatu yose yikurikiranya n’amanota 25-23 ku iseti ya kabiri, 25-19 ku iseti ya gatatu na 25-20 ku iseti ya kane, yegukana igikombe.
