France:Batatu bafunzwe bakurikiranyweho gukubita mwene wabo w’umugore wa Macron
Abagabo batatu batawe muri yombi hamwe n’umwana w’umuhungu umwe w’imyaka 16, bakekwaho uruhare mu rugomo bakoreye musaza w’umugore wa Perezida w’u Bufaransa, Brigitte Macron.
Yakubitiwe mu iduka ricuruza chocolat, ubwo yari atashye agiye mu rugo.
Abo bagabo batatu bakuru basabiwe kuguma muri gereza kugeza tariki 5 Kamena ubwo urubanza rwabo ruzaba rutangiye mu gihe umwana w’imyaka 16 we azoherezwa mu rukiko ruburanisha abana.
Jean-Baptiste Trogneux w’imyaka 30 bivugwa ko yakubiswe n’abigaragambya batemeranya na politiki ya Perezida Emmanuel Macron.
Umuryango wa Brigitte Macron umaze imyaka n’imyaka ufite iduka ricuruza chocolat mu Mujyi wa Amiens rizwi nka Jean Trogneux.
Ubwo Jean-Baptiste Trogneux yari avuye muri iryo duka asubiye mu rugo, abigaragambya bamukubisa amaso baramwirukankana kugeza bamufashe batangira kumukubita.
Se w’uwo mwana yatangaje ko bamuvunnye imbavu, agakomereka umutwe n’ikiganza.
RFI yatangaje ko abo bafashwe bakekwa basanzwe bazwiho ibikorwa by’urugomo, ndetse harimo umwe usanganywe uburwayi bwo mu mutwe
