Mu gitondo cyo kuri uyu wa mbere tariki 30 Ukuboza 2024 nibwo havuzwe impanuka y’imodoka y’ikamyo yari itwaye abantu benshi muri Leta ya Sidama yahitanye abantu 71 abandi benshi bagakomereka.
Bivugwa ko iyo kamyo yari itwaye abantu benshi, yaguye mu mugezi mu gace ka Sidama mu bilometero 300 mu Majyepfo y’Umurwa mukuru wa Ethiopia, Addis Abeba agahitana abagera kuri 71.
Komiseri wa Polisi mu gace ka Sidama, Daniel Sankura, yavuze ko abantu batanu bakomerekeye muri iyo mpanuka, bagiye kuvurirwa mu bitaro bikuru bya Bona naho abandi benshi bayiguyemo.
Yagize ati “Abantu batanu bararembye bikomeye, baracyitabwaho n’abaganga mu bitaro bikuru bya Bona. Impanuka yabaye ku cyumweru tariki 29 Ukuboza 2024, nyuma y’uko iyo modoka yarimo inyura mu muhanda urimo amakorosi menshi, ihanuka ku kiraro igwa muri mu mugezi.”
Abenshi muri abo baguye mu mpanuka ni abari bagiye mu bukwe ndetse hari n’amakuru yavugwaga ko iyo modoka yari yapakiye abantu benshi barengeje ubushobozi bwayo.
Ishami ry’Umuryango w’Abibumbye ryita ku Buzima (OMS), rigaragaza ko impanuka zo mu muhanda ziri ku mwanya wa munani mu kwica abantu benshi. Nibura abantu miliyoni 1,3 buri mwaka bapfa bazize impanuka.
