Inzu zitaratangazwa umubare zakongotse mu muriro udasanzwe wibasiye agace ka Camp Zaïre muri Komini Kadutu, mu mujyi wa Bukavu.
Ni inkongi yatangiye mu ijoro rishyira kuri iki Cyumweru tariki 4 Kanama 2023, icyakora icyayiteye ntabwo kiratangazwa.
Imiryango itari iya Leta ikorera muri Kadutu, ivuga ko inzu zisaga igihumbi zahiye zikaba umuyonga, nubwo ari imibare itaremezwa n’ubuyobozi bwite bwa Leta ya Congo. Inkomoko y’iyi nkongi na yo ntabwo iremezwa.
Perezida wa Sosiyete sivile ya Kadutu, Hypocrate Marume, yavuze ko ibintu byose byari muri izo nzu nta cyasigaye gihagaze, nk’uko inkuru ya Radio Okapi ibivuga.
Yagize ati “Ni inzu zirenga igihumbi tugenekereje, naho abantu basaga magana atatu babonye inzu zabo ziba umuyonga, nta kintu na kimwe babashije kurokoramo. Hari n’abantu bakomeretse ubu barimo kwitabwaho n’abaganga.”
Aka gace kagizwe n’inzu zari zubatswe mu kajagari, imwe icometse mu yindi ku buryo byari bigoye ko inkongi ifata igice kimwe. Inyinshi muri zo zari zubatswe n’amabati.
Hari amakuru ko inkongi ishobora kuba yatangijwe n’imbabura yari mu nzu imwe, maze umuriro ugenda wototera n’izindi.
